Nierdinga - a klois Schdädtle am Neckarstrand
Geh aus mein Herz und suche Freud
Mit dem Versle will i eischdeiga in a bewusst subjektive Beschreibung vo meim Hoimedschdädtle ond meinera Beziehung drzua.
Wer sich jetzt frogt, was dr Paul Gerhardt mit Nürtingen (vo de Eihemische meischdens Niiiiiiiierding genannt, mit mindeschdens acht "I") z-d'oo häb, der muaß wissa, daß s Alt-Wirrdaberg, also dr protestantische Doil, so ebbes wie dr deutsche "Bible-Belt" isch. DEm sei Zentrum isch zwor s heilige Korntal, aber Nierdenga isch a ganz guade Aussaschdell. Also vor Fuffzg Johr heds do koin Menscha gäa, der ed mindschdens s halbe Kirchagsangbuch hot auswendig kenna. Heit hot sich des älles a bissle, sage mr mol säkularisiert (oder sott mr gar normalisiert saga?) aber so gewisse Traditiona, dia bleibet halt. Ond wenns en Nierdinga om Traditiona goht, no schdohd dr Maiatag an alleroberschder Schdelle. Guat, für alle Nicht-Harald-Schmidt-Gucker (die kenned nämlich älle Nürtinger Traditiona ond dr Maiatagsablauf scho ausm Effeff, do merk i no emmer wieder, daß i ed dr oinzigschde bee, auf den des so n Eidruck henderlassa hott) muaß mr vielleicht erklära, daß dr Maiatag dr Nierdinger Nationalfeiertag isch.
Im Prinzip isch des au em pietistischa Umfeld, des jo mitonder scho amol älles abseits vom Schaffa ond Bibellesa, vor allem halt dr Müsiggang onds Feiera als dubios aaguckt, ieber Jahrhunderte weg dr oinzige Feierdag ausser dr Roih gwea. Ausser ronde Geburdsdäg ond Hauzicha hots ällafalls no d Kirbe geh.
Do goht no emmer n grausser Omzug durch d Stadt, und do bisch als Schüler in Nierdenga mitgfanga ond mitghanga, laufsch also mit. Für die Leischdung isch mr selbigsmol emmer mit zwoi Brezla ond 3 Mark (zwoimol Boxautolefahra) eikauft worra.
Aber om amol uff die Eigangszeile zrickzkommed, am Obed drvor wird dr Maiatag scho eigsonga. Des isch so a furchtbar wichtigs Ereigniss, daß i no nia drbei gwäa ben! Do kommed eigentlich au bloss dia wichdige Leid ond die Aagherige vo denne Sänger. Aber des senn jo au schau n ganza Haufa. Dr große Zampano isch domols emmer dr Heinrich Mauch gwäa, des war au Lehrer am MPG (wo i jo a baar Johr d Schualbank drückt han). Jetzt war der ed emmer grad dr beliebteschte onder de Schüler, vor allem et onder de Faule, also hots no weniger Gründ gäa, zom do noz-ganged.
Uff älle Fäll wird do no emmer des Lied "Geh aus mein Herz" gsonga. Do blüüühet no die pietistische Nürtinger Sääääle auf! I glaub i muaß doch no amol no, mo i des jetzt so überleg, om des zom vrleba...solang s solche echte Säääla no geit ond ed bloss no dia beim Bäcker.
Von Hölderlin bis Harald Schmidt
In de letztschte Johr isch mr emmer schdolzer worra uff seine beriehmte Abkemmling. Frieher, noch schwäbischem Understatement, hots sowas wie a Marketing jo gar ed gäa, ond ausser a baar Schduiarät ond Hoimetkulturforscher (meischdens frühpensionierte Beamte) hots eigentlich au koin gjuckt, wann wo domols dr Hölderlin oder so mol ghaust hat. Mr hot bloß gwisst, mo des Haus schdohd und dass r jo erscht in Tiebinga dr geischdiga Omnachtung anheimgfalla isch. Dr Mörike hot au amol a Jährle in Nierdinga glebt, viel länger no in dr nächera Umgebung.
Bloss kennd dia heid em mediale Zeitalter, beherrscht vom Onderschichdafernseha jo koi Sau mai. Also schiebt mr jetzt halt dr Harald vor. Der hots zwor seinerzeit glaub gschafft, sich en dr Schual ähnlich obeliebt z'macha wia I (des muaß mr airschd amol schaffa) ond isch jo onder de Leid dohannarom no umschdriddener als anderswo, aber oinaweag isch mr jetzt stolz wia Oskar, daß a Sohn der Stadt äll Woch im Fernsäh romläschdra koh, ond des no ohgschdrohft.
Von der Stricknadel zum Fräskopf
Die Nierdinger hoissed au Schdricknodla, des wird glaub a heid no jedem Schialer beibrocht. Wenn des au heid nemme ganz so ohschaulich isch. Zo meira Schualzeit hots wenigschdens em Omfeld von onsra Bildungsahschald no drei Schdrickwarafabrika gäa, heid isch bloss no dr Hauber do! Also muaß mr drzua vrzehla, daß Nierdinga mol a Zentrum dr Textilindustrie war. Faschd jeder Oiheimische wird, wenn er sich amol en Schdammbaum durchgugged, beschdimmt a baar Leid fenda, die als Schdricker oder Näher gschaffd händ. Ganz so ebbes bsonders war des jetzt au edda, denn au uff dr Alb hods frieher in jedem Kuahneschd mindeschdens oi Schdrickerei gäa. Do isch mr zo meinera Kendheit no ällaomol nuff zom Fabrikverkauf gfahra!
Heid nähed se anderswo billiger, also wird heid nemme viel gschdrickt, zmindeschd ed mit Schdoff. Aber emmerhin geits in Nierdinga no a baar gsonde Firmena. dr erschde wär do nadierlich dr Heller. Dem sai Areal nemmt n ganza Schtattdoil ei, ond Bua, wenn de beim Heller a Lehrschdell kriegsch, des wär a Sach!
Baut werret dort Werkzeigmaschina, also nix was dr Endverbraucher kenna däd. No geids jo no dr Metabo, dia bauet zwor viel meh als bloss MeTallBohrer, aber trotzdem, die ghered au zo Nierdinga ond wemmr irgendoima en ma Baumarkt schdoht odr irgendwo so a Mascheele romfahra sieht, no woiss mr: Des kommt aus Nierdenga!
Isch des ed schee!
Naitlaif am Neckarstrand
Als i no en N. zor Schual ganga ben, do hot's so ebbes glaub gar ed gäa. Naitlaif en Nierdenga. In dem Neschd isch doch nie ebbes los gwäa, wenn de ed grad zor Bombaleger-Fraktion "Ei-Adler-Sibu" (d Sibu en Kloi-Disched! Die henn domols glaub ihrn Erlees an Waffa für Eritrea gschbendet) gherd hosch, no war's a aussichtslos Onderfanga, do ebbes zom Vrleba. Nierdinga war schbädeschdens, wenns Kino zuagmacht hot, so ausgschdorba wia dr Gaza-Schdreifa. Mr hot sich ällamol ernschdhaft gfrogt, wer do a Ausgangssperre verhängt häb. A baar Boizla hots zwor emmer gäa, aber dia wared no eher wieder dubios. Ond die rigorose Regelunga, was d Sperrschdond ahgoht, die wared au ed grad förderlich.
Etzd muaß mr schau saa, daß sich des in de letzschde 10-12 Johr fundamental gändret hot.
Guat, a zwoides St. Pauli wird Nierdinga sicher nie ed wärra, aber i glaub des winschd sich au koiner so reacht. Aber wenn i etzt amol wiedr do ben, ond saga mr amol im Kino dr Schpätfilm guggd han, no sieh i tatsächlich no Leit em Schdädtle! Ond sogar dia Dönerbuda henn no offa ond a guade Handvoll Bars send gschdeckd voll! Do isch sicher d FH ed ganz ohschuldig, oh pardon, des hoissd jo mittlerweile "Nürtingen University" (i beh bloss gschpannt, wanns no amol Mayday statt Maiadag hoissd) Ond s Kino muaß mr au loba, des ziagd schau Leid en d Schdadt nei, zmoal au de jonge, die heid jo au mobil send ond flugs in Esslinga, Reitlenga oder au "uf Schduegert". Noch Kirchheim nom braucht heid aber koiner mai fahra, denn do isch mittlerweile dr Hond begraba, wia mr so hairt, friaher, do war's grad omkhaierd.
Wia sich d' Zeita so ändret. D' Effnungszeita sollet mittlerweile de liberalschte em ganza Ländle sei! An de Feschder ond Märkt platzt d Schdatdt aus älle Näht! An dr Fasnet wirds Roothaus gschdirmt ond aahschliessend dr Sauschdall! Ond en ra Bar an da Bronnschdeig schenked se Kölsch aus! Hano! Mo semmer denn! Am Neckr halt, aber des isch doch scho emmer dr bessere Rhein gwäa, oddr ed?
Autowäscha ond Wiesle mäha - em Samschdichs
I glaub en de schpäte Sechzger hot dui Kampagne oogfanga "Samstags gehört Papa mir". I glaub, am Glicklichschda uff dr ganza Welt, daß d Faif-Dad-Woch eigführt worra isch, send emmer no d Schwoba. Ond seit mr am Freidichobed bis om Achte no en da Baumarkt schbrenga koh om sich einzomdecka firs Wochaned, geids koi Halta mai!
Denn wa isch scho Freizeit? Ha, wer wird denn schau em Samschdichs bis em Middags ens Neaschd naischdracka. Des kohsch macha, wenn de deine Hörner no ed aagschdosa hoschd, en de wilde Johr, en a Disco oder so (geids eigentlich no irgendwo a gscheide?). Aber schpäteschdens wenn do mol dr Weg des Schwaben gehschd ond schaffe schaffe, dai Häusle bausch, no isch dr Samschdich grettet! Denn no wird gschafft, es ischd a wahre Pracht. Wichtig bei der Schafferei isch nadierlich, daß au älle ebbes drvoo händ. Will hoissa, dia Nochbor, die miassed des mitkriaga. Also fangt mr anema scheena Morga, em Mai oder so, allerschbädeschdens om Achte oo, vielleicht mim Häcksler, der macht jo richtig schee Krach, em Herbscht bietet sich dr Laubsauger oo, em Wender (Stihl sei Dank) d Motorsäg. So geids fir jede Johreszeit a Folterinschdrumend mit mindeschdens 90 Dezibel Geräuschemission! Ond falls älle Schdrick reissed ond sogar dr Rasa beim beschda Willa ed schau wiedr gmäht werda koh: s Auto muass jo au amol wiedr ausgsaugt wärra!
Also, am Samschdich wird gschafft, do derf no sogar d Kuche kalt bleiba ond d Frau brengt vom Eikaufa n halba Gockel oder n Döner vom Grill mit. Nochmiddags kehded die Läda eigentlich faschd älle zuamacha, zmindescht em Sommer, denn wer do drhoim schau fertig gschafft hot ond grad koi Bauschdell hot (des soll vorkomma, saged d Leit!) der muaß etzt no uff sai Schdickle. Manche hend au glei a halbs Dutzend, mo se Ahklappara miassed. S Schwobaländle muass a Paradies fir'd Hersteller vo Aahenger sei! Probier amol, om Nierdinga rom, beschdimmte Autotypa (mit Stern und/oder Kombi) ohne a Aahengerkupplung zom Kriega! Also wird dr Balkamäher uff da Aahenger ghieft ond no gauts naus ens Wiesle...ond rocket nauf dr ganze Gang...ond wiedr nonder dr ganze Gang entlang...s hot oiner sogar amol a Liadle drieber geschrieba: Dr Schwobarap!
Jetzt vrschdohd au oiner, was so an haischnupfaplogter Mensch wia-n i em Schwobaländle fir n Krippel isch. Der ko eddamol a Wiesle mäha, wa willsch au mit deem Kerle oofanga! Dr reachte Schwob edafalls mähd em Samschdich sei Wiesla aa, do kommschd ens Schwitza, reisschs Hemmed ra, no brauchsch au koi Solarium mai! Ond nocher schmeckte Bierle nomol so guat.
Kommetse Hocketse Drengadse
Des Bierle isch glaub a guads Schdichwort gwäa. I han jo schau vorich erwähnt, daß dui pietistische Ader allmählich am Abklenga ischd. Ob mr des etzt bedaura soll oddr edd, des ieberlaß i grad jedem selber. Uff eedafall isch äll Wochaend oimads a Feschdle. An Hock! Dr Name isch do freilich au Programm, denn romjucka duare mr jo beim Schaffa schau gnuag, also beim Feschdle, do wird no ghockt. Fir Reigschmeckte oder Tourischda aus Regiona, wo mr eher an der Theke schdohd, isch des Sitzfloisch von so ma Schwoba phänomenal! Denn wemmr des Plätzle mol ergattert hot, dozua lässt mr sich Zeit, erschd amol auslota, wo d Musik ed gar so grausig laut isch, gugga wo dia sitzed, dia mi haid ed oobedengt seha miassed, a bissle taxiera ond romkreisa wia dr Adler om d Beute. Ond no, noch dr dritta odr vierta Ronde uff oimal a baar Kumpels odr Fraind aus alte Tag seha, (dia mr vorher no ieberseha hot, aber etzt hot der halt grad romgucked) ond do hockt mr noo! Des isch jo au praktisch, weil no koh mr sich emmer abwechsla mitm Bier hola!
D Fraua kenned no solang uf d Kender uffpassa ond zor Hüpfburg ganga oder zom Dosawerfa. Moo bleibt hocka! Ausser, dr Druck steigt ieber 5 Bar! No hofft mr, daß scho donkel ischd, weil no braucht mr nemme uff des Kloheisle ganga, sondern kah an d Zeltwood, en d Botanik oder, beim Maiatag, en da Neckr neischiffa!
Dr Samschdichobed lässt mr no maischdens de Jonge, do schpielt jo no au so a Party-Band, Blaumeisa, Lollies et cetera. Do hend dia mit Dreizeha no ihr erschdes Promilleerlebnis. Was anderswo dr Karneval bsorgt, macht bei ons dr Dorfhock. A zinfidige Schlägerei derf do nadierlich so gega Mitternacht au ed fehla! Allerschbädeschdens wenn dr Nochwuchs aus de Nierdinger Südviertel eitrifft, no bassierts, do kosch druff ganga!
Em Sonndichs geits nadierlich au wieder Feschdla! De maischde ganged glei s ganz Wochaend. En dr Hauptsaisoh, em Mai ond Juni, hots äll Wochaend em Omkreis vo 20 Kilometer mendeschtens 5 Hocketsa! Ha, do lässt sich doch a scheena Radtour macha, oder ed? Ond em obneds wird no em Gaarda dr Grill oogschmissa, d Nochbor solled jo am Sonndich au no a bissale ebbes von oim han! Wemmr scho dr Häcksler ed ooschmeissa derf! Mit erhöhtem CO2-Wert lebt sichs völlig unbeschwert...ond no war des wiadr amol a sauguats Wochaend! Aussr dr Vau-Eff-Beh hot vrlaura...no brauchts halt a Bier mehr...
Mit dem Versle will i eischdeiga in a bewusst subjektive Beschreibung vo meim Hoimedschdädtle ond meinera Beziehung drzua.
Wer sich jetzt frogt, was dr Paul Gerhardt mit Nürtingen (vo de Eihemische meischdens Niiiiiiiierding genannt, mit mindeschdens acht "I") z-d'oo häb, der muaß wissa, daß s Alt-Wirrdaberg, also dr protestantische Doil, so ebbes wie dr deutsche "Bible-Belt" isch. DEm sei Zentrum isch zwor s heilige Korntal, aber Nierdenga isch a ganz guade Aussaschdell. Also vor Fuffzg Johr heds do koin Menscha gäa, der ed mindschdens s halbe Kirchagsangbuch hot auswendig kenna. Heit hot sich des älles a bissle, sage mr mol säkularisiert (oder sott mr gar normalisiert saga?) aber so gewisse Traditiona, dia bleibet halt. Ond wenns en Nierdinga om Traditiona goht, no schdohd dr Maiatag an alleroberschder Schdelle. Guat, für alle Nicht-Harald-Schmidt-Gucker (die kenned nämlich älle Nürtinger Traditiona ond dr Maiatagsablauf scho ausm Effeff, do merk i no emmer wieder, daß i ed dr oinzigschde bee, auf den des so n Eidruck henderlassa hott) muaß mr vielleicht erklära, daß dr Maiatag dr Nierdinger Nationalfeiertag isch.
Im Prinzip isch des au em pietistischa Umfeld, des jo mitonder scho amol älles abseits vom Schaffa ond Bibellesa, vor allem halt dr Müsiggang onds Feiera als dubios aaguckt, ieber Jahrhunderte weg dr oinzige Feierdag ausser dr Roih gwea. Ausser ronde Geburdsdäg ond Hauzicha hots ällafalls no d Kirbe geh.
Do goht no emmer n grausser Omzug durch d Stadt, und do bisch als Schüler in Nierdenga mitgfanga ond mitghanga, laufsch also mit. Für die Leischdung isch mr selbigsmol emmer mit zwoi Brezla ond 3 Mark (zwoimol Boxautolefahra) eikauft worra.
Aber om amol uff die Eigangszeile zrickzkommed, am Obed drvor wird dr Maiatag scho eigsonga. Des isch so a furchtbar wichtigs Ereigniss, daß i no nia drbei gwäa ben! Do kommed eigentlich au bloss dia wichdige Leid ond die Aagherige vo denne Sänger. Aber des senn jo au schau n ganza Haufa. Dr große Zampano isch domols emmer dr Heinrich Mauch gwäa, des war au Lehrer am MPG (wo i jo a baar Johr d Schualbank drückt han). Jetzt war der ed emmer grad dr beliebteschte onder de Schüler, vor allem et onder de Faule, also hots no weniger Gründ gäa, zom do noz-ganged.
Uff älle Fäll wird do no emmer des Lied "Geh aus mein Herz" gsonga. Do blüüühet no die pietistische Nürtinger Sääääle auf! I glaub i muaß doch no amol no, mo i des jetzt so überleg, om des zom vrleba...solang s solche echte Säääla no geit ond ed bloss no dia beim Bäcker.
Von Hölderlin bis Harald Schmidt
In de letztschte Johr isch mr emmer schdolzer worra uff seine beriehmte Abkemmling. Frieher, noch schwäbischem Understatement, hots sowas wie a Marketing jo gar ed gäa, ond ausser a baar Schduiarät ond Hoimetkulturforscher (meischdens frühpensionierte Beamte) hots eigentlich au koin gjuckt, wann wo domols dr Hölderlin oder so mol ghaust hat. Mr hot bloß gwisst, mo des Haus schdohd und dass r jo erscht in Tiebinga dr geischdiga Omnachtung anheimgfalla isch. Dr Mörike hot au amol a Jährle in Nierdinga glebt, viel länger no in dr nächera Umgebung.
Bloss kennd dia heid em mediale Zeitalter, beherrscht vom Onderschichdafernseha jo koi Sau mai. Also schiebt mr jetzt halt dr Harald vor. Der hots zwor seinerzeit glaub gschafft, sich en dr Schual ähnlich obeliebt z'macha wia I (des muaß mr airschd amol schaffa) ond isch jo onder de Leid dohannarom no umschdriddener als anderswo, aber oinaweag isch mr jetzt stolz wia Oskar, daß a Sohn der Stadt äll Woch im Fernsäh romläschdra koh, ond des no ohgschdrohft.
Von der Stricknadel zum Fräskopf
Die Nierdinger hoissed au Schdricknodla, des wird glaub a heid no jedem Schialer beibrocht. Wenn des au heid nemme ganz so ohschaulich isch. Zo meira Schualzeit hots wenigschdens em Omfeld von onsra Bildungsahschald no drei Schdrickwarafabrika gäa, heid isch bloss no dr Hauber do! Also muaß mr drzua vrzehla, daß Nierdinga mol a Zentrum dr Textilindustrie war. Faschd jeder Oiheimische wird, wenn er sich amol en Schdammbaum durchgugged, beschdimmt a baar Leid fenda, die als Schdricker oder Näher gschaffd händ. Ganz so ebbes bsonders war des jetzt au edda, denn au uff dr Alb hods frieher in jedem Kuahneschd mindeschdens oi Schdrickerei gäa. Do isch mr zo meinera Kendheit no ällaomol nuff zom Fabrikverkauf gfahra!
Heid nähed se anderswo billiger, also wird heid nemme viel gschdrickt, zmindeschd ed mit Schdoff. Aber emmerhin geits in Nierdinga no a baar gsonde Firmena. dr erschde wär do nadierlich dr Heller. Dem sai Areal nemmt n ganza Schtattdoil ei, ond Bua, wenn de beim Heller a Lehrschdell kriegsch, des wär a Sach!
Baut werret dort Werkzeigmaschina, also nix was dr Endverbraucher kenna däd. No geids jo no dr Metabo, dia bauet zwor viel meh als bloss MeTallBohrer, aber trotzdem, die ghered au zo Nierdinga ond wemmr irgendoima en ma Baumarkt schdoht odr irgendwo so a Mascheele romfahra sieht, no woiss mr: Des kommt aus Nierdenga!
Isch des ed schee!
Naitlaif am Neckarstrand
Als i no en N. zor Schual ganga ben, do hot's so ebbes glaub gar ed gäa. Naitlaif en Nierdenga. In dem Neschd isch doch nie ebbes los gwäa, wenn de ed grad zor Bombaleger-Fraktion "Ei-Adler-Sibu" (d Sibu en Kloi-Disched! Die henn domols glaub ihrn Erlees an Waffa für Eritrea gschbendet) gherd hosch, no war's a aussichtslos Onderfanga, do ebbes zom Vrleba. Nierdinga war schbädeschdens, wenns Kino zuagmacht hot, so ausgschdorba wia dr Gaza-Schdreifa. Mr hot sich ällamol ernschdhaft gfrogt, wer do a Ausgangssperre verhängt häb. A baar Boizla hots zwor emmer gäa, aber dia wared no eher wieder dubios. Ond die rigorose Regelunga, was d Sperrschdond ahgoht, die wared au ed grad förderlich.
Etzd muaß mr schau saa, daß sich des in de letzschde 10-12 Johr fundamental gändret hot.
Guat, a zwoides St. Pauli wird Nierdinga sicher nie ed wärra, aber i glaub des winschd sich au koiner so reacht. Aber wenn i etzt amol wiedr do ben, ond saga mr amol im Kino dr Schpätfilm guggd han, no sieh i tatsächlich no Leit em Schdädtle! Ond sogar dia Dönerbuda henn no offa ond a guade Handvoll Bars send gschdeckd voll! Do isch sicher d FH ed ganz ohschuldig, oh pardon, des hoissd jo mittlerweile "Nürtingen University" (i beh bloss gschpannt, wanns no amol Mayday statt Maiadag hoissd) Ond s Kino muaß mr au loba, des ziagd schau Leid en d Schdadt nei, zmoal au de jonge, die heid jo au mobil send ond flugs in Esslinga, Reitlenga oder au "uf Schduegert". Noch Kirchheim nom braucht heid aber koiner mai fahra, denn do isch mittlerweile dr Hond begraba, wia mr so hairt, friaher, do war's grad omkhaierd.
Wia sich d' Zeita so ändret. D' Effnungszeita sollet mittlerweile de liberalschte em ganza Ländle sei! An de Feschder ond Märkt platzt d Schdatdt aus älle Näht! An dr Fasnet wirds Roothaus gschdirmt ond aahschliessend dr Sauschdall! Ond en ra Bar an da Bronnschdeig schenked se Kölsch aus! Hano! Mo semmer denn! Am Neckr halt, aber des isch doch scho emmer dr bessere Rhein gwäa, oddr ed?
Autowäscha ond Wiesle mäha - em Samschdichs
I glaub en de schpäte Sechzger hot dui Kampagne oogfanga "Samstags gehört Papa mir". I glaub, am Glicklichschda uff dr ganza Welt, daß d Faif-Dad-Woch eigführt worra isch, send emmer no d Schwoba. Ond seit mr am Freidichobed bis om Achte no en da Baumarkt schbrenga koh om sich einzomdecka firs Wochaned, geids koi Halta mai!
Denn wa isch scho Freizeit? Ha, wer wird denn schau em Samschdichs bis em Middags ens Neaschd naischdracka. Des kohsch macha, wenn de deine Hörner no ed aagschdosa hoschd, en de wilde Johr, en a Disco oder so (geids eigentlich no irgendwo a gscheide?). Aber schpäteschdens wenn do mol dr Weg des Schwaben gehschd ond schaffe schaffe, dai Häusle bausch, no isch dr Samschdich grettet! Denn no wird gschafft, es ischd a wahre Pracht. Wichtig bei der Schafferei isch nadierlich, daß au älle ebbes drvoo händ. Will hoissa, dia Nochbor, die miassed des mitkriaga. Also fangt mr anema scheena Morga, em Mai oder so, allerschbädeschdens om Achte oo, vielleicht mim Häcksler, der macht jo richtig schee Krach, em Herbscht bietet sich dr Laubsauger oo, em Wender (Stihl sei Dank) d Motorsäg. So geids fir jede Johreszeit a Folterinschdrumend mit mindeschdens 90 Dezibel Geräuschemission! Ond falls älle Schdrick reissed ond sogar dr Rasa beim beschda Willa ed schau wiedr gmäht werda koh: s Auto muass jo au amol wiedr ausgsaugt wärra!
Also, am Samschdich wird gschafft, do derf no sogar d Kuche kalt bleiba ond d Frau brengt vom Eikaufa n halba Gockel oder n Döner vom Grill mit. Nochmiddags kehded die Läda eigentlich faschd älle zuamacha, zmindescht em Sommer, denn wer do drhoim schau fertig gschafft hot ond grad koi Bauschdell hot (des soll vorkomma, saged d Leit!) der muaß etzt no uff sai Schdickle. Manche hend au glei a halbs Dutzend, mo se Ahklappara miassed. S Schwobaländle muass a Paradies fir'd Hersteller vo Aahenger sei! Probier amol, om Nierdinga rom, beschdimmte Autotypa (mit Stern und/oder Kombi) ohne a Aahengerkupplung zom Kriega! Also wird dr Balkamäher uff da Aahenger ghieft ond no gauts naus ens Wiesle...ond rocket nauf dr ganze Gang...ond wiedr nonder dr ganze Gang entlang...s hot oiner sogar amol a Liadle drieber geschrieba: Dr Schwobarap!
Jetzt vrschdohd au oiner, was so an haischnupfaplogter Mensch wia-n i em Schwobaländle fir n Krippel isch. Der ko eddamol a Wiesle mäha, wa willsch au mit deem Kerle oofanga! Dr reachte Schwob edafalls mähd em Samschdich sei Wiesla aa, do kommschd ens Schwitza, reisschs Hemmed ra, no brauchsch au koi Solarium mai! Ond nocher schmeckte Bierle nomol so guat.
Kommetse Hocketse Drengadse
Des Bierle isch glaub a guads Schdichwort gwäa. I han jo schau vorich erwähnt, daß dui pietistische Ader allmählich am Abklenga ischd. Ob mr des etzt bedaura soll oddr edd, des ieberlaß i grad jedem selber. Uff eedafall isch äll Wochaend oimads a Feschdle. An Hock! Dr Name isch do freilich au Programm, denn romjucka duare mr jo beim Schaffa schau gnuag, also beim Feschdle, do wird no ghockt. Fir Reigschmeckte oder Tourischda aus Regiona, wo mr eher an der Theke schdohd, isch des Sitzfloisch von so ma Schwoba phänomenal! Denn wemmr des Plätzle mol ergattert hot, dozua lässt mr sich Zeit, erschd amol auslota, wo d Musik ed gar so grausig laut isch, gugga wo dia sitzed, dia mi haid ed oobedengt seha miassed, a bissle taxiera ond romkreisa wia dr Adler om d Beute. Ond no, noch dr dritta odr vierta Ronde uff oimal a baar Kumpels odr Fraind aus alte Tag seha, (dia mr vorher no ieberseha hot, aber etzt hot der halt grad romgucked) ond do hockt mr noo! Des isch jo au praktisch, weil no koh mr sich emmer abwechsla mitm Bier hola!
D Fraua kenned no solang uf d Kender uffpassa ond zor Hüpfburg ganga oder zom Dosawerfa. Moo bleibt hocka! Ausser, dr Druck steigt ieber 5 Bar! No hofft mr, daß scho donkel ischd, weil no braucht mr nemme uff des Kloheisle ganga, sondern kah an d Zeltwood, en d Botanik oder, beim Maiatag, en da Neckr neischiffa!
Dr Samschdichobed lässt mr no maischdens de Jonge, do schpielt jo no au so a Party-Band, Blaumeisa, Lollies et cetera. Do hend dia mit Dreizeha no ihr erschdes Promilleerlebnis. Was anderswo dr Karneval bsorgt, macht bei ons dr Dorfhock. A zinfidige Schlägerei derf do nadierlich so gega Mitternacht au ed fehla! Allerschbädeschdens wenn dr Nochwuchs aus de Nierdinger Südviertel eitrifft, no bassierts, do kosch druff ganga!
Em Sonndichs geits nadierlich au wieder Feschdla! De maischde ganged glei s ganz Wochaend. En dr Hauptsaisoh, em Mai ond Juni, hots äll Wochaend em Omkreis vo 20 Kilometer mendeschtens 5 Hocketsa! Ha, do lässt sich doch a scheena Radtour macha, oder ed? Ond em obneds wird no em Gaarda dr Grill oogschmissa, d Nochbor solled jo am Sonndich au no a bissale ebbes von oim han! Wemmr scho dr Häcksler ed ooschmeissa derf! Mit erhöhtem CO2-Wert lebt sichs völlig unbeschwert...ond no war des wiadr amol a sauguats Wochaend! Aussr dr Vau-Eff-Beh hot vrlaura...no brauchts halt a Bier mehr...
Erdbeertiger - 22. Feb, 03:02
